الله عوضه عنها بأختي

السلام عليكم ورحمة الله وبركاته
أول شي آنا آسف لكل زوار وأعضاء وإدارة منتدانا العزيز إني مقصر معاكم في المواضيع والردود
بس يارب تسامحوني ترى مشاغل الدنيا كثيرة والوقت ضيق

==============

أنا جايكم اليوم بقصة حقيقية صارت مع أحد أصدقائي
كنت من يومين جالس معاه في أحد محلاتي ومن حديث لحديث قعد يسولف لي
والله شي محزن .. ما راح تصدقون
هو حلفني إني ما أقولها لأحد .. بس أنا أخذت إذنه إني بنزلها بالمنتدى
طبعاً ما بذكر أي إسم .. حفاظاً على الخصوصية
وياريت أشوف آرائكم وردودكم عليها
ما بطول عليكم
يلا نبدأ

يقول
(والقصة على لسان صديقي)

***

كنت في يوم من الأيام ماشي في سوق (سوبر ماركت)
ولا بهالحرمة اللي جالسة تتسوق تناظر فيني
لعب بعقلي الشيطان (وأنا أول مرة أسويها بحياتي) وقلت خلني أرميلها رقم جوالي
أخذت الرقم
ورحت وتركتها
بصراحة .. ما كنت متوقع إن يجيني إتصال منها
ما فكرت بالموضوع أبد .. نسيت أصلاً إني أعطيتها رقمي

وبعد كم يوم
يجيني إتصال في الليل
رديت
ولا هي .. تكلمت معي وكلمتها
وبدينا نتكلم يوم بعد يوم
إلين جا يوم وتواعدنا
قالت لي أروح أخذها من البيت في النهار لأن زوجها بيكون في الدوام
المهم تواعدنا ثاني يوم
ومن الصبح .. رحت أنا للدوام
وجلسنا نتكلم أنا وزميلي بالعمل
قلتله عن اللي حصل معي
قال لي إترك عنك هالخرابيط .. تراهم يلعبون فيك
قلتله .. إذا مو مصدق إطلع معي وتشوف بعينك
وبعد صلاة الظهر
أخذنا إذن أنا وياه .. وطلعنا بسيارتي
ورحنا لبيتها .. يمين شمال يمين شمال ..إلين وصلنا بيتها
طلعت دقيت الباب
طلعتلي .. وقالت يلا خلنا نروح ونرجع بسرعة قبل يجي زوجي من الدوام
نزلنا وركبت معي السيارة ورى
وصاحبي جالس معي في الكرسي قدام
أشوفه متلثم
قلتله شفيك
رد وصوته حزين (إطلع المطار!)
قلت شفيك .. المطار ليش
قال إطلع ولا وصلنا بتعرف ليش
المهم .. أنا رحت المطار .. قلت يمكن يعرف مطعم أو جلسة حلوه هناك
ويوم وصلنا .. ولا ذيك المفاجأة

نزل وفتح الباب عليها
فك اللطمة .. وقال لها إنزلي
(طبعاً أنا ماني فاهم شي)
نزلت وهي تبكي
وراح بها للكاونتر وحجزلها ودخلها صالة السفر
ورجعنا السيارة
وقال إرجع المكتب ناخذ سيارتي
وفي الطريق
إتصل بأحد
أسمعه يقول إنتظروا بنتكم تراها جايتكم على أول طيارة
سألته .. قلتله الحين أنا مو فاهم شي
وش اللي صاير
إنتوا تعرفوا بعض قبل
وليش سويت كذا
قال سوق بس وديني لسيارتي
سكتت .. طبعاً وديته وأنا مصدوم
ماني عارف وش اللي صاير
ويوم وصلنا ودعني وقال أشوفك بكره في الدوام
جا ثاني يوم
رحت الدوام
وسلمت عليه .. رجعت سألته عن اللي صار أمس

هنا قال لي .. إنت تعرف من هذي اللي طلعت معنا

قلتله .. لا .. عادي وحدة من البنات

قال لا .. هذي مو أي وحدة

هذي زوجتي !!!

معقول .. زوجتك

أنا هنا تمنيت إن الأرض إنشقت وبلعتني
وش أسوي .. وين أودي وجهي منه
حس فيني .. وقال
الذنب مو ذنبك
يعني لو ما كنت إنت .. أكيد بيكون في أحد غيرك
بس الحمد لله إنها كانت فيك
عشان الله يكشفها لي
وخلاص لاتفكر في اللي صار
شي وإنتهى
يوم خلص الدوام
قلت أكلم أبوي
طبعا حنا من بلد في الجنوب
وأبوي شيخ كبير ومعروف بحكمته في البلد
كلمته .. وقلتله على كل اللي صار معي
طبعاً أول شي .. تبهدلت
قلتله أنا أستاهل .. بس أبي الحل يابوي
قال لي .. قول لزميلك إن الغدا عندي يوم الجمعة الجاية
رحت لزميلي وقلتله أبوي يقول الغدا عنده يوم الجمعة
قال لي يارجال خلاص إنسى .. الموضوع عادي وأقا من عادي
قلتله إن أبوي بيزعل لو ما رحنا
المهم سافرنا
وهناك أبوي كان جامع كل البلد على شرف زميلي
وبعد الشاي والقهوة
والغدا طبعاً

قام الوالد
ونادى خواتي الثلاث

قال لزميلي

يافلان
هذولي بناتي الثلاث .. إختر وحدة منهم .. وخذها معك زوجة الحين
جتك مبروكة وما نبي منك شي

طبعاً زميلي ما وافق أول شي
وقال هذا ياعمي مو ذنب ولدك .. هذا ذنبي إني ما عرفت أختار
بس أبوي .. طبعاً أصر على كلامه
وقاموا أهل البلد وخلوه ياخذ إختي الوسطانية
وركبت معاه ورجعوا للرياض
والحين وبعد كم سنة
ماشاء الله عليهم
صار عندهم ولدين وبنت

ها والحين شرايكم بالقصة
تراها حقيقية

أخوكم : جريح الفؤاد

الله يديك العافية ماهر ماهر
قصة حلوة وقوية
تحية راقية وهلا فيك

الله يعافيكي
مشكورة كثير على المرور الجميل
تشرفت بردك

» ((( شوفي كلام الحريم عنك إذا رقصتي )))
» عضوه جديده
» من روائع الامام علي رضي الله عنه
» ترجمة أسماء الله الحسنى باللغة الإنجليزية‏ ..
» لي مكان ولا اشيل قشي واطلع